ஆச்சரியங்கள் நிறைந்த மாய உலகம் -2

ஆச்சரியங்கள் நிறைந்த மாய உலகம்-2

இணையத்தின் வரலாறு -பாகம்-2

முதல் பாகம் படிக்க: இணைப்பை க்ளிக் செய்யவும்

கடந்த பதிவில் இணையத்திற்கு துவக்கப்புள்ளி வைத்த அமெரிக்காவின் அச்சம் பற்றியும்,இன்று நம்மிடையே மாபெரும் ஊடகமாக (media) அவதாரம் எடுத்திருக்கிற இந்த இணையத்தின் தாத்தா ஆர்பாநெட் பற்றிய அறிமுகத்தையும் பார்த்தோம்...

அமெரிக்கா மற்றும் ரஷ்யா இடையே நடந்த பனிப்போர் காரணமாக அமெரிக்க பாதுகாப்பு துறையால்(D.O.D) ஆர்பாவின் கையில் ஒரு செயற்திட்டம் கொடுக்கப்பட்டது என்று கடந்த பதிவிலேயே கூறி இருந்தேன்.

D.O.D(அமெரிக்க பாதுகாப்பு துறை)

சில நன்பர்கள் பனிப்போர் என்றால் என்ன என்று என்னிடம் வினவியிருந்தார்கள்,அவர்களுக்காகவும்.,பனிப்போர் பற்றிய வினா மனதிற்குள் எழுந்த இன்ன பிற வாசகர்களுக்காகவும் அது பற்றி ஓரிரு வரிகளில் அடுத்த தலைப்பில் பார்த்துவிடுவோம்.. பனிப்போர் விவரம் வேண்டாம் என்று நினைப்பவர்கள் அடுத்த தலைப்பிற்கு தாவி விடலாம்.

பனிப்போர் (Cold War):

பொதுவாக போர்களை ஆங்கிலத்தில் மூன்று வகையாக பிரிக்கின்றனர்.

1.Hot War(ரத்த களமாக,ஆயுத பிரயோகங்களுடன் நடக்கும் போர்.)

2.Warm War(இரு நாடுகளிடையேயும் பேச்சுவார்த்தை இன்னும் நடந்து கொண்டிருக்கிறது ஆனாலும்,இரு நாடுகளின் தரப்பும் போரிட தயார் நிலையில் இருக்கின்றன,இவர்களிடையே எந்த நேரத்திலும் போர் நடக்கலாம் என்கிற நிலை.)

3.Cold War (இரு நாடுகளுக்கிடையேயும் நேரடியாக சண்டை நடக்காது,ஆனால் இரண்டும் தங்கள் எதிர்ப்பையும் ,ராணுவ முன்னேற்றங்களையும் காட்டி தங்களை பலமான நாடாக காட்டிக்கொள்ளும்.தங்களுக்கு பிடித்த நாடுகளுக்கு உதவியாகவும் ,பிடிக்காத நாடுகளுக்கு எதிரணியாகவும் நின்று பிற நாடுகளுக்கு உதவும்(??) .தங்கள் போரை பிற நாடுகளில் நிகழ்த்தும்,நேரடி சண்டை இருக்காது).

அமெரிக்க-ரஷ்ய பனிப்போர்:

இரண்டாம் உலகப்போரில் அமெரிக்கா மற்றும் ரஷ்யா இணைந்துதான் செயல்பட்டன அப்போதே இவைகளிடையே கருத்து வேறுபாடுகள் இருக்கத்தான் செய்தன,இரண்டாம் உலகப்போரின் முடிவில் கருத்து வேறுபாடுகள் தீவிரமடைந்தன இவ்விரு நாடுகள் இடையே நடந்த அரசியல் மற்றும் ராணுவம் சார்ந்த முன்னேற்றங்கள் மற்றும் சாதனைகள் போன்றவற்றில் நடந்த நெறுக்கடிகள்,போட்டாப்போட்டிகள்,அணு ஆயுத சோதனைகள் போன்றவையே அமெரிக்க-ரஷ்யப் பனிப்போர் .இரண்டாம் உலகப்போரின் முடிவு தொடங்கியதிலிருந்தே அமெரிக்க-ரஷ்ய பனிப்போரும் துவங்கியிருந்த்து. 1945 முதல் 1980 வரை இது தொடர்ந்தது.

ரஷ்யா 1957-ல் ரஷ்யா தனது முதல் செயற்கைகோளை செலுத்தியது,கண்டம் விட்டு கண்டம் தாவும் ஏவுகணைகளை சோதனை செய்தது,அமெரிக்கா அணு அயுதங்கள் தயாரித்தது, விண்வெளி ஆராய்ச்சி செய்தது, நிலவுக்கு மனிதனை அனுப்பியது,இவை எல்லாமே பனிப்போரின் பாகமே...இணையமும் இந்த பனிப்போர் பெற்று தந்த பரிசு தான்.பனிப்போருக்கு நம் நன்றிகளை தெறிவித்துக்கொள்வோம்...

ஆர்பா:

பனிப்போர் போரின் முன்னோடியாக அமைய முடியும் என்பதை நாம் அறிவோம்.இதனால் அமெரிக்க அரசாங்கம் ரஷ்யா செய்த ஒவ்வொரு நடவடிக்கையையும் எச்சரிக்கை உணர்வுடன் கண்காணித்தது. ரஷ்யா தனது ரானுவத் தகவல் தொடர்பை துண்டித்து விட்டால் என்ன செய்வது.போர் திட்டத்தை செயல்படுத்தும் சிக்கலை எப்படி நிவர்த்தி செய்வது ,தகவல் தொடர்பு அறுபடாமல் இருக்க புதிய வழிமுறை உள்ளதா? என்கிற ஆராய்ச்சியில் ஈடுபட்டு ஒரு கண்டுபிடிப்பை நிகழ்த்துமாறு ஆர்பா(ARPA) வை கேட்டுக்கொண்டது.ஆர்பா சில பல வருடங்களாக ஆராய்ச்சி செய்து1969-ல் ஆர்பாநெட் எனும் ஒரு திட்ட அறிக்கையை சமர்ப்பித்தது.

இணையத்தின் தாத்தா – ஆர்பாநெட்:

துண்டிப்பிலாத தகவல் தொடர்பை தருவதற்காக ஆர்பாநெட் Packet Switching எனும் கருத்துருவை (Concept)பயன்படுத்தியது.உலகின் முதல் தகவல் துணுக்கு பரிமாற்றம் [த.து.பரிமாற்றம்] (packet switching) ஆர்பா இணையத்தில் தான் நிகழ்ந்தது. Packet Switching பற்றி பிரிதொரு பதிவில் விளக்கமாக சொல்கிறேன்,தங்களை குழப்பிக்கொள்ள வேண்டாம்...

முன்னிருந்த தொழில்நுட்ப கருவிகள் மின்சுற்று விசை அமைவை (Circuit Switching) அடிப்படையாக கொண்டு இயங்கியவை தொலைபேசி,தந்தி போன்றவை. த.து பரிமாற்றத்தின் அடிப்படையில் தான் இன்றைய இணையமும் செயல் பட்டு கொண்டிருக்கிறது.இதனால் தான் ஆர்பா-நெட்டை இணையத்தின் தாத்தா என்று செல்லமாக அழைக்கிறார்கள்.

இணையத்தின் வளர்ச்சியை அடுத்தடுத்த பதிவுகளில் பார்க்கலாம்...

மின்னஞ்சல் முகவரி:vijayandurairaj30@gmail.com

மாய உலகம் தொடரின் பிற பாகங்களை படிக்க இங்கே க்ளிக்கவும்

1 கொசுவர்த்தி = 100 சிகரெட் ! ஒரு அதிர்ச்சி ரிப்போர்ட்!

 சுத்தமில்லாத காற்றால் தன்னை நிறைத்துக்கொண்டு,அவதிப்படும் சுற்றுபுறத்திற்குள் சிக்கிகொண்டு அரோக்கியத்தை இழந்து வரும் நவீனமயமாகி விட்ட நம்மை அதிர்ச்சியூட்ட இன்னுமொரு செய்தியை புதிய அராய்ச்சி வெளியிட்டுள்ளது.

இது என்ன புதுக்கதை??

   
  கொசுவை விரட்ட பயன்படுத்தப்படும் கொசுவர்த்திகள் வெளியிடும் புகை 100 சிகரெட்கள் வெளியிடும் புகைக்கு சமமான பாதிப்பை ஏற்படுத்துகின்றனவாம்....தொடர்ந்து படியுங்கள்...

   சென்னையிலுள்ள தேசிய தொற்று நோய் ஆராய்ச்சி நிறுவனம் சமீபத்தில் வீட்டில் பயன்படுத்தும் பூச்சிகொல்லிகளால் ஏற்படும் நோய்களை பற்றி ஆராய்ச்சி ஒன்றை நடத்தியது இதில் கொசுக்களை விரட்ட நாம் பயன்படுத்தும் சுருள்கள் வெளியிடும் புகையால் என்ன பாதிப்புகள் ஏற்படுகின்றன என்ற ஆராய்ச்சியும் ஒன்று.
 கொசுவை விரட்ட பெரும்பாலான (96 % )மக்களால் பயன்படுத்தப்படும் ,நாம் தூங்குகின்ற வேளையில் நம்முடனே குறைந்தது ஏழு மணிநேரமாவது இருக்கும் இந்த கொசுவர்த்திகள் வெளியிடும் புகை இவ்வளவு தீமைகளை பரிசளிக்க கூடியது என்று நாம் நினைத்து கூட பார்த்திருக்க மாட்டோம்.ஆனால் அது வெளியிடும் புகை நூற்றுகணக்கான சிகரட்டுகள் வெளியிடும் புகையினால் வரும் பாதிப்பை தருகிறது என்று அந்த ஆராய்ச்சி தன் முடிவை சொல்லி நமக்கு அதிர்ச்சி தருகிறது.அதிலும் மலேசிய மற்றும் சீன கொசுவர்த்தி சுருள்களில் இருந்து வெளியாகும் புகை 134 சிகரெடுகளுக்கு சமமான தீங்கை தருகின்றனவாம்..!

கொசுவர்த்திகளில் என்ன உள்ளது??

  நச்சு புகையை வெளியிடும் அளவிற்கு இந்த சுருள்களில் என்ன பொருட்கள் உள்ளன என்று நான் இணையத்தை ஆராய்ந்தேன் ...
கொசுவர்த்தி தயாரிக்க தேவையான பொருட்கள்:

1.பைரத்ரின்(Pyrethrins)
2.மரத்தூள்
3.தேங்காய் ஓட்டு கரி
3. தூபப்பொடி (அ) சமித்து பிசின்)(joss powder).
4.கலப்பிகள் (Binders)
5.நைட்ரேட்கள் (Nitrates)மற்றும் 
6.சேர்ப்பு பொருட்கள்(additives)

  கொசுவர்த்தியின் மூலப்பொருட்களில் கொசுவை விரட்ட பயன்படும் முக்கிய பொருள் பைரத்ரின் எனும் ரசாயனம்.இது சாமந்திப்பூவிலிருந்து(chrysanthemum) பெறப்படுகிறது.இது தாவரங்களின் மூலம் கிடைக்கும் பொருள் தான் என்பதால் இதனால் மனித குலத்திற்கு தீமைகள் குறைவு தான்.ஆனால் இது மீனினங்கள் மற்றும் பூச்சியினங்களை செயலிழக்க செய்யும் தன்மை உடையது.

            சாமந்திப்பூ

   கொசுவை விரட்ட தேவையான இந்த பைரத்ரின் சாதாரணமாக புகையை வெளியிடும் அளவு எரியாது,எரிந்தாலும் நீண்ட நேரம் வராது,மேலும் எளிதில் சிதைவுறும் தன்மையுடையது.
   இதை நீண்ட நேரம் புகைய வைக்க இதனுடன் சேர்க்கப்படும் மேலே குறிப்பிட்டிருக்கும்(மேலே குறிப்பிட்டுள்ள பட்டியலில் உள்ள முதல் மூன்று பொருட்களால் தீங்கில்லை ) மீதமுள்ள பொருட்கள் தான் தீங்கு விளைவிக்கின்றன.கொசுவர்த்தியில் 99% இவைகள் தான் உள்ளன மீதமுள்ள ஒரு சதவீதமே பைரத்ரின் !(ரசாயனங்களின் உதவியின்றி நீண்ட நேரம் பைரதிரின்-ஐ எரிய வைக்க ஏதாவது முறையிருந்தால் நன்றாக இருக்கும்.!)

கொசுவர்த்திகளில் நிகோடின் இல்லையே பின் இவை எப்படி சிகரெட்டுகளுடன் ஒப்பீடு செய்யப்படுகின்றன??

   உண்மைதான் கொசுவர்த்திகளில் சிகரெட்டில் உள்ள நிகோடின் எனும் பொருள் கிடையாது..சிகரெட் தரும் தீமைகள் அத்தனையையும் சளைக்காமல் இந்த புகையும் தருகிறது.
     கொசுவர்த்தி புகையில்....

• பாலி அரோமடிக் ஹைட்ரோ கார்பன் (PHC)
• ஃபார்மால்டிஹைடு(Formaldehyde)
• அசிட்டாலிடைடு(acetaldehyde)
• மற்றும் பென்சீன் ,தொலுவீன் 

போன்ற பொருட்கள் உள்ளன இவை சிகரெட் புகையை விட மோசமான விளைவுகளை ஏற்படுத்த வல்லவை...

இந்த புகை நுரையீரல்,கல்லீரல் போன்ற உடல் உள்ளுருப்புகளை பாதிக்கிறது

இதய நோய்களுக்கான வாய்ப்புகளையும் ,சர்க்கரை நோய்க்கான வாய்ப்புகளையும் அதிகரிக்கிறது.

ஆஸ்துமா,சுவாசக்கோளாறுகள்,புற்று நோய்க்கான காரணியாகவும் அமைகின்றன....

அம்மாடியோவ்...! 

இயற்கை முறையில் கொசு விரட்டும் வழிமுறைகளை நோக்கி நாம் இனிமேலாவது நகருவோம்...

ஆச்சரியங்கள் நிறைந்த மாய உலகம் -1

(இணைய உலகின் வரலாறு -1)

எந்த தகவல் கேட்டாலும்அள்ளி கொண்டுவந்து கொட்டும்அற்புத விளக்காக இருக்கிற அற்புத உலகம்.நாம் அனைவரையும் உலகத்தின் எந்த மூலையில் எங்கே இருந்தாலும் இணைத்து வைக்கிற சாதனம்.நான் இந்த கட்டுரையை எழுதவும் நீங்கள் இந்த கட்டுரையைவாசிக்கவும் துணையாக இருக்கும் இந்த மாய உலகம்.எப்படிஉருவானது?, ஏன் உருவானது?,அதன் செயல்பாடு என்ன? என்றெல்லாம் இந்த தொடர்பதிவின் மூலம்கொஞ்சம் விரிவாக நான் உங்களுடன்பகிர்ந்து கொள்ள விழைகிறேன்.வாசகர்கள் நன்பர்கள் தங்கள் ஆதரவையும் ,கருத்துக்களையும் மறக்காமல்தெரிவிக்கவும்.

இணைய உலகம் தோன்ற அவசியம் என்ன ??

“மனிதன் ஒரு சமூக விலங்கு” என்று புகழ்பெற்ற வாசகம் ஒன்று உண்டு. தன் கருத்துக்களை,எண்ணங்களை,மற்றும் தகவல்களை மற்றவர்களோடு பகிர்ந்து கொள்ள வேண்டும்,பிற மனிதர்களோடு,உறவுகளோடு தொடர்பு கொள்ள வேண்டும் என்று மனித மனம் குரங்கிலிருந்து மனிதனாக மாறத் துவங்கியதிலிருந்தே சிந்திக்க துவங்கியிருந்தது.

தகவல் தொடர்பு ஆதிமனிதர்களிடமிருந்து சைகைகள்,புகை குறியீடுகள்,தூதுவர்கள்,புறா விடு தூது என படிப்படியாக வளர்ந்து இன்று நாம் பயன்படுத்தும் இந்த இணையம் வரை வளர்ந்திருக்கிறது.

இணையம் என்கிற இந்த மாய உலகம் உருவாக மையப்புள்ளியாக இருந்தது தகவல் தொடர்பு தான்..,ஆனால் இணைய உலகம் உருவாக முக்கிய காரணமாக இருந்த விசயம் பயம் ! .

இணையத்திற்கு அச்சாரம் இட்ட அமெரிக்காவின் அச்சம்:

ரஷ்ய அரசாங்கம் (USSR) அக்டோபர் 4, 1957 ஆம் வருடம் பூமியின் வளிமண்டலத்தை ஆராய்ச்சி செய்து பூமிக்கு தகவல் அனுப்ப கூடைபந்தைவிட சற்றே அளவில் பெரியதான ஸ்புட்னிக் என்ற ஒரு செயற்கைகோளை விண்ணில் ஏவியது.

இதுதான் அந்த ஸ்புட்னிக்-1

விண்ணுக்கு செலுத்தப்பட்ட உலகின் முதல் செயற்கைகோள் இதுவே.ரஷ்யாவின் இந்த செய்கையை கண்டு அமெரிக்கா திடுக்கிட்டது. இதற்கு போட்டியாக ஏதாவது செய்தே ஆக வேண்டும் என்கிற விடாப்பிடியான எண்ணத்தில் இருந்தது.ஆச்சரியம் மற்றும் அதிர்ச்சியின் பிடியில் இருந்து அமெரிக்கா மீள்வதற்குள் லைக்கா எனும் நாய்குட்டியுடன் அதே வருடம் நவம்பர் 3 -ல் ஸ்புட்னிக்-2எனும் அடுத்த செயற்கைகோளை அனுப்பியது.

அமெரிக்காவின் அச்சம்

அதிர்ச்சி,ஆச்சரியம் இவைகளுடன் அச்சமும் அமெரிக்காவை கவ்விக்கொண்டது.ரஷ்யா விண்ணில் செயற்கை கோள் அனுப்புகின்றதென்றால் தன் நாட்டின் மீது ஏவுகணை அனுப்ப முடியுமே என்று பயம் கொண்டது அமெரிக்கா.

அமெரிக்காவின் பயத்தின் விளைவாக அமெரிக்க பாதுகாப்பு துறையின் (DOD)உட்பிரிவாக ஆர்பா (ARPA) Advanced Research Project Agency என்ற அமைப்பு 1958 ல் துவங்கப்பட்டது.

ஆர்பா துவங்கப்பட்டு 18 மாதங்களில் ஆர்பாவின் விஞ்ஞானிகளால் ஸ்பட்னிக் செயற்கைகோளிற்கு போட்டியாக எக்ஸ்ப்ளோரர்-1 என்ற செயற்கைகோள் தயாரிக்கப்பட்டது. இது ஸ்புட்னிக்கை விட கொஞ்சம் மேம்பட்டதாக தயாரிக்கப் பட்டிருந்தது 1958 ஜனவரி 31 –ம் திகதி வின்னை தொட்டது அமெரிக்காவின் முதல் செயற்கை கோளான எக்ஸ்ப்ளோரர்-1

எக்ஸ்ப்ளோரர்-1

அமெரிக்க ராணுவத்தின் உட்பிரிவாக துவங்கப்பட்ட இந்த ஆர்பா தான் இப்போது நாம் பயன்படுத்திக்கொண்டிருக்கும் இணையத்திற்கான விதையாக அமைந்தது.

ஆர்பா-இணையத்தின் விதை:

ஆர்பா அமைப்பானது விண்வெளி ஆராய்ச்சி,தகவல் தொடர்பு மற்றும் பாதுகாப்பு போன்ற விசயங்களுக்காக அமைக்கப்பட்டிருந்தது. ஆர்பா அமைப்பு, பாதுகாப்பு துறையின் பிரிவாக மட்டும் இருக்கும் விதமாக, முதல் செயற்கைகோளை ஏவிய கையோடு விண்வெளி ஆராய்ச்சிக்காக NASA எனும் அமைப்பை தனியாக உருவாக்கியது அமெரிக்கா.

அச்சமயத்தில் அமெரிக்காவில் பனிப்போர் காலம்.போர் காலங்களில் தகவல் தொடர்பு சாதனங்களுக்கான(Electronic-Communication)இணைப்புகள் சில இடங்களில் அவ்வப்போது துண்டிக்க படுவதுண்டு.இதனால் மொத்தமாக அனைத்து ரானுவ தளவாடங்களிடையேயும். தகவல் பறிமாற்றம் தடைப்பட்டது.தனது ராணுவத் தளவாடங்களிடையே தகவல் தொடர்பு தங்கு தடையின்றி நல்ல முறையில் அமைய வேண்டும் என விரும்பிய அமெரிக்க அரசு இந்த செயற்திட்டத்தை(Project)ஆர்பாவின் கையில் ஒப்படைத்தது.

ஆர்பா பலமாக ஆராய்ச்சி செய்து ஆர்பாநெட் என்கிற திட்டம் ஒன்றை சமர்ப்பித்தது.இந்த ஆர்பாநெட் தான் இன்றைய இணையத்தின் தாத்தா. நம் முன்னே பிரம்மாண்டமாக வளர்ந்து நிற்கும் இணையத்தின் காரணகர்த்தாவான ஆர்பாநெட் பற்றியும் அதன் வளர்ச்சிகள் பற்றியும் விவரமாக தெரிந்து கொள்ள அடுத்த வாரம் வரை காத்திருங்கள்...

மாய உலகம் தொடரின் பிற பாகங்களை படிக்க இங்கே க்ளிக்கவும்