என் தேவதை அனிதாவுக்கு எழுதிய கடிதம்

(திடங்கொண்டு போராடு - காதல் கடிதம் பரிசுப் போட்டிக்காக   எழுதப்பட்டது) 

(உன் வீட்டில் உன்னைத்தவிர யாருக்கும் புத்தகம் வாசிக்கும் பழக்கம் இல்லை என்பது மிகவும் வசதியாக போயிற்று, இந்த "தேவதைகளின் தேவதை" புத்தகத்திற்குள் நான் எழுதி வைத்திருக்கும் இந்த கடிதத்தை என் அனிதா வாசிக்க துவங்கியிருப்பாள் என்று நம்புகிறேன்)

இன்று காலையில் உன் பெயர் தாங்கி உன் வீட்டு முகவரியிலிருந்து ஒரு திருமண பத்திரிக்கை எனது அலுவலக விலாசத்திற்கு வந்திருந்தது,  உன் வீட்டு விலாசத்தை பார்த்தபோது மனது கொஞ்சம் பகீர் என்றது. பத்திரிக்கையை படித்து பார்த்தபோது தான் விவரம் புரிந்தது திருமணம் உன் அக்காவிற்கென்று. (அடிப்பாவி இப்படியா பதற வைப்பாய் ? )

எப்படி இருக்கிறாய் ?அத்தை,மாமா,உன் தம்பி ,அக்கா எல்லோரும் நலமா? கல்லூரி வாழ்க்கை எப்படி போகிறது ?,இங்கு நான் நலம் , சிங்கப்பூர் வாசம் நன்றாக தான் இருக்கிறது, குடும்பத்தையும், உன்னையும் பிரிந்து இருப்பதை நினைக்கும் போது மட்டும் சிறைவாசம் ஆகி கொல்கிறது ,கடந்த முறை ஊருக்கு வந்தபோது உன்னை பார்த்தது.. கிட்டத்தட்ட ஐந்து மாதம் ஆயிற்று உன்னைப் பார்த்து. வெளிநாடு கிளம்பும் செய்தியை உன் வீட்டில் சொல்ல வந்த போது உன் கையால் நீ கொடுத்த அந்த Coffee யின் இனிப்பு இன்னும் என் நாக்கிலேயே இருக்கிறது.

என் செல்ல தேவதைக்கு செல்போன் கூட வாங்கி கொடுக்காத Strict மாமா மீது கோபம் கோபமாக வருகிறது., பேசி ரொம்ப நாள் ஆச்சே பத்திரிக்கையுடன் ஒரு கடிதம் எழுதி வைத்து அனுப்ப இவளுக்கு என்னவாம் என்று உன் மீதும் கொஞ்ச நேரத்திற்கு முன்பு வரை கோபப்பட்டு கொண்டு இருந்தேன்.

மேஜை மீதிருந்த கல்யான பத்திரிக்கையையும், கவரையும், கவரிலிருந்த உன் பெயரையும் உன் நினைவோடு வெறித்துப் பார்த்து கொண்டிருந்த போது கவருக்குள் வார்த்தைகள் எதனாலும் விவரித்து சொல்லிவிட முடியாத வெட்கமும் கோபமும் கலந்த உனது மௌனத்தை என்னால் காண முடிந்தது.

என் 'அனி' ரொம்பவே புத்திசாலி சில நிமிடங்கள் உன்னை தவறாக எண்ணி கோபித்துவிட்டேன் !, இது ஒன்றும் எனக்கு புதிதல்ல ,மௌனம் உனக்கும் புதிதல்ல .  வார்த்தைகளின் கலப்பு சிறிது கூட இல்லாமல் நீ சிந்துகிற ஒற்றை மௌனத்திற்கே ஓராயிரம் அர்த்தங்கள் இருக்கிறதே ! எந்த அர்த்தத்தில் நீ மௌனித்திருக்கிறாய் என்பதை அறிய முடியாமல் ஒவ்வொரு முறையும் குழம்பிப்போகிறேன், பல முறை உன் மௌனப் புதிர்களுக்கு அர்த்தம் தெரியாமல் என் அறிவு தோற்றுப் போயிருக்கிறது !, என்ன செய்ய ? ஆண்டவன் படைப்பில் ஆணினமே இப்படித்தான் போல.

இந்த முறை உன் மௌனத்திற்குள் மௌனமாக ஒளிந்திருக்கும் உன் எண்ணங்களை என்னால் உட்கிரகிக்க முடிகிறது . நீ சொல்லாமல் சொல்லவந்த விசயத்தை சொற்கள் ஏதுமின்றியே என்னால் புரிந்து கொள்ள முடிகிறது.

உன் அக்காவின் திருமணம் முடிந்து உன் திருமணப் பேச்சை எடுக்க குறைந்த பட்சம் ஒரு வருடமாவது ஆகும் என்று நம்புகிறேன்.கொஞ்ச நாள் பொறுமை காப்பதில் தவறேதும் இல்லை என்றே நினைக்கிறேன் !

ஏன் நான் காத்திருக்க வேண்டும் என்று கேட்கிறாயா? பண நிலையில் நல்ல நிலைக்கு வருவதற்கு முன் மணம் பற்றி பேசுவது மடத்தனம். என்பது என் கருத்து., நீயும் இதில் ஒத்துப்போவாய் என்று நம்புகிறேன், கடந்த முறை நம் ஊர் பெரிய கோவில் ஆயிரம் கால் மண்டபத்தை நாம் ஆயிரத்து நான்கு கால்களாக்கி நடந்திருந்த ஒரு தினத்தில் உன்னிடம் இதை நான் முன்பே கூறியிருந்தேன் !

உன்னோடு சேர்ந்திருக்க வேண்டும் என்ற ஆசை உன்னைப்போலவே எனக்கும் நிறையவே உண்டு.எல்லாம் நன்றாகவே நடக்கும் என்று எனக்கு நம்பிக்கை இருக்கிறது, நீயும் நம்பிக்கை தளரவிடாதே ! மெல்ல மெல்ல நம் வீட்டில் நம் காதல் விவகாரத்தை புரிகிற மாதிரி எடுத்து சொல்ல முயற்சிக்கலாம். எதிர்ப்புகளை எதிர்ப்பதற்கு பதிலாக எதிர்கொள்ள கற்றுக் கொள்வோம்.

பிரிந்து வாழ்வது என்பது கொஞ்சம் கடினம் தான். நினைவுகளை துணைக்கழைத்துக்கொள்..உன் நினைவாக உன் நினைவுகள் என்னிடம் நிறையவே இருக்கின்றன. விவரமறியா வயதில் விளையாட்டுத்தோழியாக நீ அறிமுகமானது முதல்....

உன் கைப்பிடித்து வட்டமிட்டது, ஊஞ்சலில் உன்னை உட்காரவைத்து ஆட்டிவிட்டது, கண்ணாமூச்சி ஆடிய போது கண்ணை கட்டிக்கொண்டு உன்னைக் கட்டிப்பிடித்தது, ஒரு ஆரஞ்சு மிட்டாய் வாங்கி உன் பாவடைத்துணிக்குள் சுருட்டி எச்சில் படாமல் நீ கடித்து தந்தது., கண்கள் மூடி உன்னை நினைத்துக்கொள்ளும் போதெல்லாம் இப்படி எத்தனையோ விசயங்களை என் கண் முன் காட்டி என்னை மீண்டும் குழந்தையாக்கி, குட்டி தேவதையாக மாறி என் இழந்துவிட்ட சொர்க்கம் நோக்கி இப்போதும் கூட என் அனிதா இழுத்து செல்கிறாள்.

உனக்கு நினைவிருக்கிறதா, பாவடை சட்டைக்குள் மொட்டாக இருந்த நீ மலராக மாறி தாவனிக்கு தாவிய அந்த நாட்களில், அதன் அர்த்தம் கேட்டு விவரமறியாமல் விடலைத்தனமாக நான் கேட்ட வினாவிற்கு பதிலேதும் சொல்லாமல், என் மடியில் உன் கைகளால் தட்டிவிட்டு மாயமாய் மான் குட்டிப்போல ஓடி மறைந்து சொல்ல வந்த்தை சொல்லாமல் சொல்லிச்சென்றாயே !

என் அனிதா புத்திசாலி எப்போது என்ன செய்ய வேண்டும் என்றும், எதை எப்போது செய்ய வேண்டும் என்றும் அவளுக்கு நன்றாக தெரியும்.

உன் மனதை நம்பிக்கைகளாலும்,நினைவுகளாலும் நிறைத்துக்கொள்.உன் அக்கா கல்யாணத்திற்கு வர முடியாததற்காக வருந்துகிறேன்.நிச்சயம் உன் கல்யாணத்திற்கு வருவேன் .
 - என்றும் உன் நினைவுகளோடு உன் விஜயன்   

குறிப்பு: இக்கடிதத்துடன் நான் தங்கியிருக்கும் வீட்டு விலாசத்தை இணைத்துள்ளேன்,அடுத்த முறை அந்த விலாசத்திற்கே கடிதம் எழுது, அலுவலக முகவரிக்கு வேண்டாம்.